१७ मंसिर, सप्तरी । घात अन्तरघातका कारण चुनाव हार्नुपरेको भन्दै एमाले सप्तरीमा भाँडभैलो शुरु भएको छ । १ नम्बर क्षेत्रीय कमिटिको बैठकले चुनाव हराउन भूमिका खेलेको आरोपमा राष्ट्रिय प्रतिनिधि परिषद् सदस्य एवम् समानुपातिक उमेदवार उषा पोखरेल र जिल्ला कमिटिका प्रचार विभाग प्रमुख प्रकाश खतिवडालाई कारवाही गर्न माग गरेको छ ।
रुपनगरमा बसेको क्षेत्रीय कमिटिको बैठकले पोखरेल र खतिवडालाई कारवाही गर्न माथिल्लो कमिटिसाग माग गर्ने निर्णय गरेको हो । बैठकमा कन्द्रीय कमिटि सदस्य सत्यनारायण मण्डल, क्षेत्रीय इन्चार्ज बसन्त मिश्र, पूर्व जिल्ला कमिटि सदस्य शिवनारायण साह र विष्णुदेव चौधरीले समेत अन्तराघात गरेको भन्दै चर्काचर्की भएपछि छानविन गर्न क्षेत्रीय कमिटि अध्यक्ष बोधराज सुवेदीको संयोजकत्वमा छानविन आयोग गठन गरेको हो ।
कारवाही प्याकुरेलमाथि नैः खतिवडा
यता कारवाहीको सिफारिसमा परेका एमाले सप्तरीका प्रचार विभाग प्रमुख प्रकाश खतिवडाले आरोप तथ्यहीन भएको भन्दै प्रमाणित गर्न चुनौति दिनुभएको छ । पार्टी विरुद्ध आफूले अन्तरघात नगरेको दावी गर्दै खतिवडाले जिल्लाका ५ वटै क्षेत्रमा हराउन क्षेत्र नं. का उमेदवार सुमनराज प्याकुरेलको मूख्य भूमिका रहेको बताउनुभएको छ । जिल्लाका सबैजसो कार्यकर्तालाई एक नम्बर क्षेत्रमा केन्द्रीत गरी राष्ट्रिय र स्थानीय सबै स्रोतको दुरुपयोग गरी आफ्नो क्षेत्रमा लगाएको खतिवडाको भनाई छ । ‘पार्टी कार्यकर्तालाई अविश्वास गरी अन्य पार्टीका नवप्रवेशीहरुलाई महत्व दिइयो, संगठन भन्दा पैसाको बलमा चुनाव जित्ने दुस्साहस भएको छ ।’ खतिवडाले भन्नुभयो ।
क्षेत्र नं. ३ का राष्ट्रिय प्रतिनिधि परिषद् सदस्य समेत रहेका प्याकुरेलले मतदान गरेको क्षेत्र नं. ३ मा प्रत्यक्षतर्फका उमेदवार मञ्जु साहले प्याकुरेलकै कारण ५ सय ३ मत मात्र प्राप्त गरेको प्रचार विभाग प्रमुख खतिवडाको दावी छ । ‘आफूले चुनाव जित्न प्याकुरेलले क्षेत्र नं. ३ मा कांग्रेससाग सौदावाजी गरेका थिए, २ सय ५५ मतले क्षेत्र नं. ५ मा पराजित एमाले अध्यक्ष गोविन्द न्यौपानेलाई हराउने काममा समेत प्याकुरेलको भूमिका छ ।’ खतिवडाले भन्नुभयो ।
प्याकुरेलको योजना र राज्यव्यवस्था विभागका सदस्य दीवाकर देवकोटा, अञ्चल सदस्य जगदीश साह तथा जिल्ला अधिवेशनमा न्यौपानेसाग अध्यक्ष पदमा पराजित भएका देवनारायण चौधरीको प्रत्यक्ष संलग्नतामा क्षेत्र नं. ५ मा न्यौपानेलाई हराएको खतिवडाले आरोप लगाउनुभयो ।
यता छानविन गर्न बनेको आयोग नै विवादमा तानिएको छ । आयोगमा पार्टी अनुशासन उलंघन गरी ०६४ को संविधानसभा निर्वाचनमा एमाले छाडेका र मंसिर ४ भन्दा हप्ता दिनअघिमात्र एमालेको टीका थापेका उपेन्द्र नारायण साह र लामो समयदेखि अमेरिका बस्दै आएका तथा चुनाव जिते राजनीतिक नियुक्ति गराईदिने आश्वासन पाएका सुरेश पोखरेल आयोगका सदस्य रहनुले पनि आयोग निर्देशित प्रतिवेदन तयार पार्ने खतिवडाले दावी गर्नुभयो ।
यसैबीच चुनावी समीक्षा गर्न बसेको क्षेत्रीय भेलामा चुनावमा एक करोड खर्च भएको प्याकुरेलले बताउनुभएको क्षेत्रीय भेलामा उपस्थित रुपनगर-२ का मनिष श्रेष्ठले बताउनुभयो । भेलामा कार्यकर्ताको एक एक नाम लिंदै प्याकुरेलले खर्च अनुसार भोट नआएको भन्दै असन्तुष्टी व्यक्त गर्नुभएको थियो । चुनावी खर्चको नाममा आफ्नै कार्यकर्तालाई समेत खरिद विक्री गरेको श्रोतको दावी छ ।
क्षेत्रीय कमिटिको बैठकमा पैसा बाँडेकै कारण चुनाव हार्नुपरेको गुनासो प्याकुरेलले राख्नुभएको बैठकका एक सहभागीले बताए । १० लाख बढी खर्च गर्न नपाउने आचारसंहिताको प्रावधान विपरित उमेदवारले एक करोड खर्च गरेको हाकाहाकी भन्नु आचारसंहितको ठाडो उलंघन भएको एक सहभागीले बताए ।

नयाँ दिल्ली, श्रावण २२ - भारतीय प्रधानमन्त्री मनमोहन सिंहको निम्तामा औपचारिक भारत भ्रमणमा रहेका कांग्रेस सभापति सुशील कोइरालाले सोमबार भारतीय प्रधानमन्त्री सिंह, राष्ट्रिय सुरक्षा सल्लाहकार शिवशंकर मेनन र विदेश सचिव सुजाता सिंहसँग भेटवार्ता गरेका छन् । मंगलबार कांग्रेस गठबन्धन नेतृ सोनिया गान्धी, विदेशमन्त्री सलमान खुर्सिद, विपक्षी दलकी नेतृ सुष्मा स्वराजसहितसँग भेटवार्ता गर्दैछन् । पार्टीका महामन्त्रीद्व प्रकाशमान सिंह र कृष्णप्रसाद सिटौलालाई साथमा लिएर दिल्ली पुगेका कोइरालाले भ्रमण सोचेभन्दा सफल भएको बताएका छन् ।

भारत भ्रमण कस्तो भइरहेको छ ?

निकै व्यस्त छु । भेटघाट जारी छन् । आज प्रधानमन्त्री मनमोहन सिंहसँग वार्ता भयो, अर्थपूर्ण कुराकानी भए । भ्रमण उपलब्धिमूलक छ, अपेक्षा गरेभन्दा सफल

लक्ष्मणपुर बाँधको कुरा उठाउने भन्नुभएको थियो । सिंहसँग त्यस्तो कुरा भयो ?

मैले नेपाल-भारत सीमावर्ती क्षेत्रमा देखिएको बाढीपहिरोको प्रकोपबारे कुरा उठाएँ । दुवै देशको हितमा रहने गरी प्राकृतिक विपत्ति रोक्ने काम थाल्न सुझाएको छु ।

एक महिनाकै अन्तरमा कांग्रेसकै देउवापछि तपाईं आउनुभएको छ । किन यसरी दोहोरिँदै निम्ता गएको हो ?

होइन, नेपाली कांग्रेससँग भारतको सम्बन्ध विशिष्ट छ, ऐतिहासिक महत्त्वको छ । यसरी भ्रमण भइरहनु अन्यथा होइन । देउवाजी पूर्वप्रधानमन्त्रीका हैसियतमा आउनु भएको हो, म पार्टी सभापतिका रूपमा ।
भनेपछि पार्टीगत भ्रमण हो यो ?
देउवाजी आएर द्वैपक्षीय सम्बन्ध सुधार्ने पक्षमा काम भएको हो, म पनि द्वैदेशीय चासो र सम्बन्धका विषयमा केन्दि्रत छु ।
यसअघि पनि तपाईंलाई भारत भ्रमणमा बोलाइएको थियो । तर तपाईं भारतसँग रुष्ट रहेकाले आउन नचाहेको भन्ने टिप्प्णी हुने गरेको छ नि ?
त्यसो होइन । म भारतसँग कहिल्यै रुष्ट छैन । मेरो छवि बिगार्न गरिएको यो दूषित प्रचार मात्रै हो । यसको कुनै अर्थ छैन  ।

काठमाडौ, असार २९ - संविधानसभा चुनावका पक्षमा चीनले औपचारिक भनाइ सार्वजनिक गरेपछि बेइजिङ पुगेका माओवादी नेताले नयाँ सम्झौतापछि नयाँ तिथिमा गरिने चुनावमा मात्र भाग लिन सकिने बताएका छन् ।
भ्रमणको अर्को पक्ष पनि छ । अध्यक्ष मोहन वैद्य र उपाध्यक्ष सीपी गजुरेलको तीनदिने बेइजिङ बसाइलाई माओवादीले दक्षिण छिमेक भारतका लागि 'सन्देशमूलक' बनाएको थियो । पार्टी गठन भएको एक वर्ष पुग्दा भारतले सधैं 'टाढाको सम्बन्ध' राखेको निष्कर्ष उनीहरूको थियो । यसबीचमा भारतले माओवादी नेताहरूलाई भ्रमणमा बोलाएको छैन । बेइजिङ उडेकै भोलिपल्ट काठमाडौं आउँदै गरेका भारतीय विदेशमन्त्री सलमान खुर्सिदको भ्रमण र भेटघाटबारे पनि माओवादीले भारतीय पक्षबाट केही जानकारी पाएको थिएन ।
पृष्ठभूमिका यस्ता कारणलाई शुक्रबार छर्लंग पारिदिए अन्तर्राष्ट्रिय व्युरोको नेतृत्वसमेत सम्हालेका माओवादी उपाध्यक्ष सीपी गजुरेलले । 'एक हातले ताली बज्दैन नि,' चीनले आफूहरूलाई महत्त्वपूर्ण राजनीतिक शक्तिका रूपमा हेरेको तर भारतले नहेरेको खुलस्त पार्दै उनले भने, 'चीनले बोलाउँछ, हामी जान्छौं । भारतले हामीलाई महत्त्वपूर्ण राजनीतिक शक्तिजस्तो ठान्दैन । हामी पनि गएका छैनौं ।'
एक वर्षको बीचमा अध्यक्ष वैद्यसहित माओवादी टोलीले दोस्रोपटक चीन भ्रमण गरेको छ । पछिल्लोपटक गत सोमबार राति वैद्य र गजुरेल चीन पुगी त्यहाँका उपराष्ट्रपति र कम्युनिस्ट पार्टीको विदेश विभागका शीर्ष नेताहरूसँग भेटघाट गरेका थिए ।
अध्यक्ष वैद्यले संविधानसभा चुनावमा सहभागी हुने/नहुनेबारे चिनियाँ पक्षले केही सुझाव नदिएको जानकारी दिए । बरु नेपालमा शान्ति र स्थायित्व कायम हुनुपर्ने, आर्थिक विकास र संवृद्धि भई जनताको जीवनस्तर माथि उठ्नुपर्ने र आन्तरिक मामिलामा दलका नेताहरू आफैंले निर्णय गर्नुपर्ने विषयमा चिनियाँ नेतृत्वको चासो रहेको वैद्यले जानकारी दिए । 'चुनावमा भाग लिने/नलिने जस्ता विषय आन्तरिक मामिला हुन् । त्यसलाई सबै पार्टी मिलेर टुंग्याउनुपर्छ,' भ्रमणबारे कान्तिपुरसँग उनले भने, 'यसो गर्नुस्, उसो गर्नुस् भनेर हामीलाई भनेको छैन । भन्ने कुुरा पनि होइन ।'
चीनले खासगरी तिब्बती मामिला र क्षेत्रीय शक्ति सन्तुलनका लागि नेपालको राजनीतिक अवस्थाप्रति चासो प्रकट गर्दै आएको छ । आन्तरिक मामिलामा हस्तक्षेप नगर्ने घोषित उसको नीति छ । तर दुई देशका पार्टी-पार्टी र जनता- जनताबीच सम्बन्ध बढाउने कामलाई भने चीनले पछिल्लो समय तीव्र बनाएको छ ।
'चीन आफू पनि नेपालको आन्तरिक मामिलामा हस्तक्षेप गर्दैन । अरूले पनि हस्तक्षेप नगरोस् भन्ने चाहन्छ,' भारततर्फ इंगित गर्दै अध्यक्ष वैद्यले बेइजिङ भ्रमणबारे भने, 'हामीले आफ्नो देशका समस्या आफैं मिलाउने हो । चीनको चासो पनि यस्तै थियो ।'
माओवादीले मंसिर ४ को घोषित मिति खारेज हुनुपर्ने, राजनीतिक नेतृत्वको सरकार हुनुपर्ने, त्यसका लागि सर्वपक्षीय गोलमेच सभा गरी समाधान खोज्नुपर्ने भन्दै वार्ताका लागि तयार रहेको जनाएको हो । त्यसबारे चिनियाँ पक्षलाई जानकारी गराएको नेता गजुरेलले बताए । 'राजनीतिक तहबाट समाधान नखोजी चुनावमा जानु राम्रो होइन भनी ैप्रस्ट कुरा राख्यौं,' संवाद डबलीले राजधानीमा आयोजना गरेको कार्यक्रममा गजुरेलले थपे ।  कान्तिपुर